नारायण स्तोत्रम्

नारायण स्तोत्रम्

नारायण नारायण जय गोविंद हरे ॥
नारायण नारायण जय गोपाल हरे ॥

करुणापारावार वरुणालयगंभीर नारायण ॥ 1 ॥
घननीरदसंकाश कृतकलिकल्मषनाशन नारायण ॥ 2 ॥
नारायण नारायण जय गोविंद हरे…

यमुनातीरविहार धृतकौस्तुभमणिहार नारायण ॥ 3 ॥
पीतांबरपरिधान सुरकल्याणनिधान नारायण ॥ 4 ॥
नारायण नारायण जय गोविंद हरे…

मंजुलगुंजाभूष मायामानुषवेष नारायण ॥ 5 ॥
राधाधरमधुरसिक रजनीकरकुलतिलक नारायण ॥ 6 ॥
नारायण नारायण जय गोविंद हरे…

मुरलीगानविनोद वेदस्तुतभूपाद नारायण ॥ 7 ॥
वारिजभूषाभरण राजीवरुक्मिणीरमण नारायण ॥ 8 ॥
[बर्हिनिबर्हापीड नटनाटकफणिक्रीड नारायण]
नारायण नारायण जय गोविंद हरे…

जलरुहदलनिभनेत्र जगदारंभकसूत्र नारायण ॥ 9॥
पातकरजनीसंहार करुणालय मामुद्धर नारायण ॥ 10 ॥
नारायण नारायण जय गोविंद हरे…

अघ बकहयकंसारे केशव कृष्ण मुरारे नारायण ॥ 11 ॥
हाटकनिभपीतांबर अभयं कुरु मे मावर नारायण ॥ 12 ॥
नारायण नारायण जय गोविंद हरे…

दशरथराजकुमार दानवमदसंहार नारायण ॥ 14 ॥
गोवर्धनगिरि रमण गोपीमानसहरण नारायण ॥ 15 ॥
नारायण नारायण जय गोविंद हरे…

सरयुतीरविहार सज्जन​ऋषिमंदार नारायण ॥ 16 ॥
विश्वामित्रमखत्र विविधवरानुचरित्र नारायण ॥ 17 ॥
नारायण नारायण जय गोविंद हरे…

ध्वजवज्रांकुशपाद धरणीसुतसहमोद नारायण ॥ 18 ॥
जनकसुताप्रतिपाल जय जय संस्मृतिलील नारायण ॥ 19 ॥
नारायण नारायण जय गोविंद हरे…

दशरथवाग्धृतिभार दंडक वनसंचार नारायण ॥ 20 ॥
मुष्टिकचाणूरसंहार मुनिमानसविहार नारायण ॥ 21 ॥
नारायण नारायण जय गोविंद हरे…

वालिविनिग्रहशौर्य वरसुग्रीवहितार्य नारायण ॥ 22 ॥
मां मुरलीकर धीवर पालय पालय श्रीधर नारायण ॥ 23 ॥
नारायण नारायण जय गोविंद हरे…

जलनिधि बंधन धीर रावणकंठविदार नारायण ॥ 24 ॥
ताटकमर्दन राम नटगुणविविध सुराम नारायण ॥ 25 ॥
नारायण नारायण जय गोविंद हरे…

गौतमपत्नीपूजन करुणाघनावलोकन नारायण ॥ 26 ॥
संभ्रमसीताहार साकेतपुरविहार नारायण ॥ 27 ॥
नारायण नारायण जय गोविंद हरे…

अचलोद्धृतचंचत्कर भक्तानुग्रहतत्पर नारायण ॥ 28 ॥
नैगमगानविनोद रक्षित सुप्रह्लाद नारायण ॥ 29 ॥
[भारत यतवरशंकर नामामृतमखिलांतर नारायण]

नारायण नारायण जय गोविंद हरे नारायण ॥
नारायण नारायण जय गोपाल हरे नारायण नारायण नारायण ॥

इति श्रिमच्छंकराचार्य विरचितं नारायण स्तोत्रं संपूर्णम् ॥